La stad totga alla «malancuneia», la malsogna la pi derasada digls Grischuns.

La brama profonda per igl paeis muntagnard s’exprima an bleras

canzungs e poesias. Malancuneia è pero daple tgi en sentimaint romantic

per deis trests an teras estras. La stad d’Oirgen gioia cun las dimensiuns dalla «malancuneia». La famiglia emigrada digls Carischs ans ò inspiro tar en nov teater ed en codesch istoric. Nous cantagn canzungs popularas e rachintagn istorgias da bandunos. Coreografs da tot igl mond relatan da viadis an monds infantils e teras povras. Igl pitschen erox «Tredeschin» viagia alla curt digl rètg da Frantscha e sessour tras l’antiers Svizra. Nous construign ena tor segl pass digl Gelgia tgi porscha vedutas melancolicas da Paris anfignen St. Petersburg. Nous perscrutagn las structuras architectonicas dalla vischnanca da Riom ed ans faschagn pansiers sur da futurs bietgs. Igls Cantoris decantan la patria eterna, igl tschiel gregorianic, igl prototip da tot igls lis da malancuneia.